Система
Регистраци
Кěмелли


 Юмахсем
 Халапсем
 Юрăсем
 Сăвăсем
 Пурнăç йěрки
 Ваттисен сăмахěсем
 Ялсем
 Шупашкар
 Ссылкăсем

 Добавить
 Пěтěм список
 Хушмаллисем
 Шырамалли
 Сайт çинчен
 Инструкци

 

    Пит хĕрӳллĕ иртрĕ чĕрĕк,
    Эп вĕрентĕм тăрăшса.
    Ман юлташчĕ кӳршĕ хĕрĕ,
    Вăй вылянă юр ашса.
    
    Урока та хатĕрленнĕ
    Юнашар ларса куллен.
    Пĕр-пĕриншĕн хăпĕртенĕ
    Лайăх вĕреннипелен.
    
    Халь эпир ӳссе çитетпĕр,
    Вăтанма пуçларăмăр.
    Маншăн вăл сар кайăк евĕр,
    Пĕр-пĕрне куçларăмăр.
    
    Хĕр çинчен шутлатăп вĕçсĕр,
    Çывăрма выртсассăн та,
    Тĕлĕкре курасчĕ кĕçĕр
    Пурçăн тумлă вăрманта.
    
    Юрату çапла пулать-ши? —
    Тĕлĕнетĕп эп хамран.
    Хĕр ман шухăша туять-ши,
    Кулмĕ-ши сиссен манран!
    
    Пурпĕрех хăйса калаймăп
    Чун-чĕре хĕмленнине,
    Урăх никама саваймăп:
    Пăркăçлаймăп чĕрене.
    
    Маншăн спорт вăййи сăваплă,
    Палăрасчĕ-ха шкулта.
    Кĕрешме кирлех хăватлăх,
    Ытларах ĕçлес тулта.
    
    Çирĕп йĕкĕте тиркеймĕç
    Салтака кайма лексен,
    Шкулĕпех мана хисеплĕç,
    Чунĕ туртăнĕ пикен.
    
    Эп сăра та тутанмастăп,
    Кирлĕ мар пирус-сигар.
    Нихăçан çынна хăртмастăп,
    Ма пулас карма çăвар?
    
    Ват çынна хисеп тăвасчĕ,
    Пулăшасчĕ кирлĕ чух.
    Концертра хитре юрласчĕ,
    Ăшшăн пăхтăр савăк чун.
    
    Ĕç тесен — вут пек çунатăп,
    Вулама та ӳркенмен.
    Аслă шкул çинчен шутлатăп:
    Вĕренни — ахах, мерчен.
    
    Кӳршĕ хĕрĕ — çут хĕвелçĕм,
    Юратмашкăн тивĕçех,
    Пуртăр-ха чунра телейçĕм, —
    — Шанчăк, кайăк пек вĕçех!
    
Петр Гаврилов-Меречен
    "Сувар" №1 (472) 05.01.2003 хаçачěнчен илнě

Тěп страницă
Статья ссылки :: Пичет версиĕ