Система
Регистраци
Кěмелли


 Юмахсем
 Халапсем
 Юрăсем
 Сăвăсем
 Пурнăç йěрки
 Ваттисен сăмахěсем
 Ялсем
 Шупашкар
 Ссылкăсем

 Добавить
 Пěтěм список
 Хушмаллисем
 Шырамалли
 Сайт çинчен
 Инструкци

 

    Пĕр вăкăр юман кутне выртнă, тет те, йĕкелĕсем пăт-пат ӳкеççĕ, тет. Вăкăр ку йĕкел ӳкнипе хăраса каять: «Кунта пăшалпа переççĕ-çке»,—тет.
    Пырать-пырать те такана тел пулать. Така çапла калать:
    — Ну, вăкăр тус, —тет,—мана та илсе каятни?—тет.
    — Атя, атя,—тет вăкăр,—печчентен иккĕн авантарах пулĕ,—тет.
    Каяç-каяç те автана тĕл пулаç. Автан калать:
    — Ну. Вăкăр тус, мана та илсе каятни?—тет.
    — Атя, атя,— тет вăкăр,—иккĕнтен виççĕн авантарах пулĕ, —тет.
    Каяç-каяç, хура тĕл пулаç. Хур калать:
    — Вăкăр тус, мана та илсе каятри?—тет.
    — Атя, атя,— тет вăкăр,—виççĕнтен тăваттăн авантарах пулĕ,—тет.
    Каяç-каяç, кушака тĕл пулаç. Кушак калать:
    — Вăкăр тус, мана илсе каятри?— тет.
    — Атя, атя,—тет вăкăр,—тăваттăнтан пиллĕкĕн авантарах пулĕ,—тет.
    Каяç-каяç, пĕр вырăна чарăнаç. Кушак калать:
    — Атя, вăкăр тус, пӳрт лартар,— тет.
    — Мана пĕр хӳтлĕх пулсан юрать,— тет вăкăр.
    Кушак калать:
    — Атя, така тус, пӳрт лартар,— тет.
    — Мана та хӳтлĕх пулсан юрать,— тет така. Ку та килĕшмерĕ.
    Кушак каллех калать:
    — Атя, хур тус, пӳрт лартар,— тет.
    Хур калать:
    — Мана пĕр вак куç пулсан юрать,—тет.
    Кушак калать:
    — Атя, автан тус, пӳрт лартар,— тет. р
    Автан калать:
    — Мана пĕр кашта пулсан çитет, — тет.
    Кушак тус пĕчченех пӳрт лартрĕ, тет. Пырать, тет, вăкăр кушак пӳрчĕ патне.
    — Уç, кушак тус,—тет. Кушак:
    — Кайса тăр хӳтлĕхне,—тет.
    — Уçсан уç, атту пӳртне ишеп,— тет вăкăр.
    Кушак уçса кĕртрĕ, тет. Унтан така пычĕ, тет.
    — Уç, кушак тус.—тет. Кушак калать:
    — Кайса тăр хӳтлĕхне, — тет.
    — Уçсан уç, атту тĕксе йăвантарса ярап,— тет така.
    Кушак уçса кĕртет. Унтан хур пырать те калать:
    — Уç, кушак тус,—тет. Кушак калать:
    — Кайса лар вак куçна,—тет.
    — Уçсан уç, атту мăкна йăлт çăлса пĕтереп,—тет хур.
    Кушак уçса кĕртрĕ, тет. Хайхи автан пычĕ, тет:
    — Уç, кушак тус,—тет. Кушак калать:
    — Кайса лар кашту çине,—тет.
    — Уçсан уç, атту йăлтах тăприне чавса пĕтереп,—тет автан.
    Кушак ирĕксĕр уçса кёртрĕ, тет. Кусем çапла пурăнаç, тет. Пурăнсан-пурăнсан, кунта кашкăр ушкăнĕ пычĕ, тет.
    — Тавай кунта кĕрер,—тесе калаç, тет.
    Пирвай ват кашкарĕ кĕрсе кайрĕ. тет. Кĕчĕ, тет те, вăкăрпа така ăна персе хĕстерчĕç, тет. Автанĕ:
    — Кикириккиик!— тесе авăтса ярать, тет.—Тавай тĕкне татас,—тет.
    Хурĕ калать, тет:
    — Кака-как, кака-как, тавай пуçне çурас,—тесе калать, тет.
    Хайхи кашкăр тухса тарчĕ, тет.
    — Ах тур, унта май мар,—тесе калать, тет.— Тавай тарар,—тесе калать, тет.— Вăкăрĕпе таки пĕтĕмпе сĕксе хĕстерчĕç,—тет.—Хурĕ: «Кака-как, пуçне çурас,—тесе калать», тет.—Автанĕ: «Тĕкне татас,—тесе калать», тет.
    Кашкăрсем:
    — Тавай тарар,—теççĕ, тет.
    Хайхисем каяç-каяç, тет. Халь те пулин каяç. тет.

Тěп страницă
Статья ссылки :: Пичет версиĕ