Чăваш юррисем, юмахěсем, халапěсем:

    Пĕр мухтанчăк, хăй валли пӳрт кăмаки тутарма шухăшласан, кăмака тăвакана чĕнсе пырса унран:
    — Итле-халĕ, эсĕ ман пӳрт валли кăмака туса парăн-и? — тесе ыйта пуçларĕ, тет.
    — Парăп — тесе каларĕ, тет, кăмака тăваканĕ те.
    — Туса парасса парăн та, анчах эсĕ манăн пӳрт кăмакине мĕнле те пулнн çынсенĕн кăмакисенчен урăх тĕрлĕ ту, — тет хуçи.
    — Епле урăх тĕрлĕ? — тесе ыйтать, тет, ку ăнланаймасăр.
    — Мĕнле те пулин çынсенĕнчен урăхларах пултăр, — тет хуçи.
    Кăмака тăваканĕ пăртакçă шухăшласа пăхса тăчĕ, тет те:
    — Юрĕ, туса парăп, çынсенĕнчен урăхларах пулĕ, — терĕ, тет.
    Хуçи киле кайсан, ку кăмака тăвакан ăста пӳрт кăмакине пӳртĕн тул енне турĕ хучĕ, тет те:
    — Эпĕ пӳрт кăмакине туса пĕтертĕм, атя епле тунине пырса пăх, — тесе, хуçине кăмака курма чĕне пуçларĕ, тет.
    — Епле, çынсенĕн пек туса памарăн-и? — тесе ыйтать, тет, хуçи. I
    — Çук, çынсенĕн пек тумарăм, — тет ăсти.
    — Апла пулсан, атя-халĕ, епле тунине пырса курам, — терĕ, тет те, иккĕш курма тухса кайрĕç, тет.
    Пӳрчĕ ăшне кĕрсе пăхсан, кăмакине курмасăр:
    — Кăмаку санăн ăçта? — тесе ыйта пуçларĕ, тет, хуçи кăмака тăвакан ăстинчен.
    — Пӳртĕн камакине эпĕ тул енне туса лартрăм, — тет ăсти.
    — Мĕншĕн апла унта туса лартрăн? — тесе ыйта пуçларĕ, тет, хуçи тĕленсе.
    — Мĕншĕн тăвасси-мĕнĕ, çынсенĕн пек тума хушмарăн вĕт, çавăнпа эпĕ пӳртĕн кăмакине çынсенĕнчен мĕнпе те пулин уйрăм тумашкăн юри тул енне лартсаттăм, — тет ăсти те кулса.

Тěп страницă

Статья ссылки :: Пичет версиĕ

Admin тӳрлетнě, информацие 2006-07-30 17:31:32 вăхăтра улăштарнă. 8831 хут пăхнă.