Система
Регистраци
Кěмелли


 Юмахсем
 Халапсем
 Юрăсем
 Сăвăсем
 Пурнăç йěрки
 Ваттисен сăмахěсем
 Ялсем
 Шупашкар
 Ссылкăсем

 Добавить
 Пěтěм список
 Хушмаллисем
 Шырамалли
 Сайт çинчен
 Инструкци

 

    Пĕрре кашкăр вăрманпа иртсе пырать, тет. Курать, тет, вăл улатăпана. Улатăпа ун чухне йывăç шакканă. Кашкăр калать:
    — Мĕн чухлĕ йывăç шаккатăн — шурă пӳрт лартаймастăн!— тет.
    — Эсĕ мĕн чухлĕ сурăх çуратăн, çапах та шурă кĕрĕк çĕлетейместĕн! — тет улатăпи.
    Кашкăр çĕвĕç патне кайрĕ, тет те:
    — Мана кĕрĕк çĕлесе паратăн-и? — терĕ тет.
    — Паратăп, — тет çĕвĕçи.
    — Миçе тир кайĕ вара ăна?— тесе ыйтать кашкăрĕ.
    — Аллă сурăх çурсан çитĕ,— тет çĕвĕçĕ.
    Кашкăр каять те аллă сурăх çурса килсе парать.
    Нумай тăрать-и, сахал тăрать-и — кашкăр килет кĕрĕк ыйтма. Çĕвĕçĕ калать:
    — Çуррине çĕленĕ ĕнтĕ,— тет.
    Хай кашкăр тепре килет те:
    — Ěлкĕртни?—тет.
    Хуçи:
    — Кĕр-ха!— тет.
    Кашкăр кĕрсен, çĕвĕç калать:
    — Пĕтернĕччĕ те-ха, арăм хăнана тăхăнса кайрĕ,— тет.
    Хай кусем каяççĕ, тет, шырама. Кайсан-кайсан, чӳрече витĕр курать, тет, кашкăр шурă кĕрĕк выртнине. Кусем кĕчĕç, тет, пӳрте. Пурте çывăрнă. тет. Кашкăрĕ:
    — Атя тĕпсакайне сăра ĕçме!—тет.
    — Атя,— тет çынни.
    Анчĕç. Малтан çынни ĕçрĕ, унтан кашкăрĕ ĕçрĕ. Иккĕшĕ кăшт çеç пĕр пичĕкене пĕтермерĕç, тет. Унтан татах çынни ĕçе пуçларĕ. Хăй калать, тет, кашкăра:
    — Асту, ан юрла!—тет.
    Хай унччен те пулмарĕ, тет, кашкăрĕ ӳлесе те ячĕ, тет. Куна илтсен, пурте сиксе тăчĕç, тет те, тытăнчĕç, тет, кашкăра чышкă пама: хăшĕ турчăкапа, хăшĕ çатма тимĕррипе, хăшĕ ухватпа. Хай кашкăра çапла вĕлерчĕç, тет те, тирне сӳсе сутрĕç, тет.

Тěп страницă
Статья ссылки :: Пичет версиĕ